ვაშლი გულ-სისხლძარღვთა სისტემის ფუნქციონირებისათვის აუცილებელი მიკრონუტრიენტია!

როცა ჩვილისათვის ვაშლს არჩევთ, თავდაპირველად გირჩევთ,  მწვანე ან ყვითელი ფერის ვაშლი შეარჩიოთ.  ამ ხილის სასარგებლო თვისებებზე და აუცილებლობაზე ბავშვის ჯანმრთელობისთვის, პედიატრი, თამარ ობგაიძე საუბრობს.

პედიატრი განმარტავს, რომ ვაშლის კანის ფერადოვნებას მის კანში ფლავანოიდების და ანთოციანების მაღალი შემცველობა უზრუნველყოფს.

ვაშლი ალბათ მთელ მსოფლიოში ყველაზე პოპულარული ხილია, უამრავი ჯიშით, ფართო გავრცელებით. უმიც, მოშუშულიც, წვენის, პიურეს, თუ ნამცხვრის შემადგენლობაში,  გემრიელი და სასარგებლოა.

დიალოგი- ფსიქოთერაპიის სახლი

წარმოშობით ცენტრალური აზიიდანაა , სადაც მისი ველური წინაპარი  Malua Sieversii ახლაც იზრდება.

ვაშლის შესახებ ცნობილი ხუმრობა გეცოდინებათ – სამმა ვაშლმა შეცვალა სამყარო დასაბამიდან დღემდე – სამოთხის, ნიუტონის და სტივ ჯობსის.

არის კიდევ ერთი ცნობილი გამოთქმა ვაშლის შესახებ – ის გასული საუკუნიდან მოდის და უელსელებს ეკუთვნით – “ერთი ვაშლი დღეში და ექიმი არ დაგჭირდება! “

 ვაშლის სასარგებლო ქიმია:

ვაშლის მთავარი შემადგენელი მარონუტრიენტები  წყალი და ნახშირწყლებია. თუმცა ნახშირწყლები მარტივი შაქრებიითაა წარმოდგენილი (გლუკოზა, ფრუქტოზა, სუკროზა), ვაშლის გლიკემიური ინდექსი არ არის მაღალი.

სავსეა c ვიტამინით.

შეიცავს საკვები ბოჭკოების დიდ რაოდენობას, რაც ნაწლავური მიკროფლორის ზრდისა და განვითარებისათვის სჭირდება, ეს ნივთიერებები ყაბზობის პროფილაქტიკის საუკეთესო საშუალებაა.

ცხოველებზე ჩატარებული კვლევების შედეგები მიუთითებენ, რომ ვაშლის შემადგენლობაში არსებულ ანტიოქსიდანტებს, განსაკუთრებით,  ქვერცენტინს ანტივირუსული, ანტიბაქტერიული და სიმსივნის საწინააღმდეგო მოქმედება აქვს. განსაკუთრებით აქტუალურია ეს კავშირი მსხვილი ნაწლავის კიბოს შემცირებულ რისკთან.

2019 წელს გამოქვეყნებულმა ექსპერიმენტულმა კვლევებმა აჩვენა, რომ ამ ნივთიერებებს ნერვული უჯრედების – ნეირონების დაცვა შეუძლიათ. შეგახსნებთ, რომ ნეირონები ის უჯრედებია, რომელთაც დაზიანების შემდეგ აღდგენის ან ახლით ჩანაცვლების უნარი არ აქვთ.

ვაშლი შეიცავს კალიუმს, რაც გულ-სისხლძარღვთა სისტემის ფუნქციონირებისათვის აუცილებელი მიკრონუტრიენტია.

რკინა ის ნივთიერებაა, ურომლისოდაც ჰემოგლობინი არ სინთეზირდება. ამიტომ ვაშლი რკინადეფიციტური ანემიების პროფილაქტიკისათვის საუკეთესო საკვებია.

ვაშლის შემადგენლობაშია K ვიტამინი, რომელიც სისხლის შედედების პროცესებში მონაწილეობს.

გახსოვდეთ, რომ ვაშლის მიღება გაღიზიანებული ნაწლავის სინდრომის დროს მუცლის ტკივილის და გაზების დაგროვებას იწვევს ფერმენტირებადი ორიგო, მონო და დისაქრიდების შემცველობის გამო, ამიტომ ასეთ შემთხვევაში თქვენს პედიატრთან კონსულტაცია უნდა გაიაროთ.

ვაშლის კანის ფერადოვნებას მის კანში ფლავანოიდების და ანთოციანების მაღალი შემცველობა უზრუნველყოფს. რაც უფრო მკევთრი ფერისაა ვაშლი, მით მეტია მასში პიგმენტები, რაზეც შეიძლება პატარას ალერგია ჰქონდეს.

ამიტომ, როცა ჩვილისათვის ვაშლს არჩევთ, თავდაპირველად გირჩევთ,  მწვანე ან ყვითელი ფერის ვაშლი შეარჩიოთ.  მისი შეტანა რაციონაში 6 თვიდან შეგიძლიათ, როცა ძუძუ უკვე აღარ აკმაყოფილებს ჩვილის მოთხოვნილებას საკვებ ინგრედიენტებზე და დამატებით კვებას იწყებთ.

არ დაგავიწყდეთ, რომ ვაშლი, ისევე როგორც ყველა ახალი საკვები, მცირე დოზებით უნდა დაიწყოთ და ბავშვის რეაქციას დააკვირდეთ.

მოკლედ, უელსელებმა იქნებ ცოტა უტრირებაც გააკეთეს, მაგრამ ვაშლი მართლა ძალიან სასარგებლო ხილია და აუცილებლად შეიტანეთ თქვენი პატარას რაციონში.

მასალა მოამზადა: ნათია ხარბედიამ

 

Share on facebook
Share on twitter
Share on linkedin
მსგავსი სიახლეები